Sóun stjórnvalda á verðmæti fjárfestinga.

Eins og segir í greininni, sem blogg þetta er hengt við, standa margar byggingar, sem hannaðar hafa verið fyrir heilbrigðisþjónustu auðar.  Margar þessara byggingar standa auðar með öllum tækjum og tólum sem notuð voru, áður en kreppan skall á og skera þurfti niður.

 Allt þetta húsnæði ásamt tækjum og tólum sem þar inni eru fjárfesting, sem hugsað var á sínum tíma til þess að skila verðmætum.  Ekki endilega verðmætum í beinhörðum peningum, heldur fyrst og fremst þeim verðmætum sem búa í góðu heilbrigði þjóðarinnar. Að fólk hafi sem minnstar fjarvistir af vinnumarkaði og geti sem fyrst hafið störf að nýju, að lokinni meðferð og skilað inn sínum skerf af verðmætasköpun í landinu, í ríkiskassann.

 Núna er staðan reyndar þannig, að lítil þörf er á vinnuafli í landinu, enda ríkir hér ca 8-10 % atvinnuleysi, sem eflaust væri töluvert meira, ef að fjöldi fólks hefði ekki flutt burt frá landinu.  Það gæti slegið á rökin um þau verðmæti sem glatast, þegar annars vinnufært fólk er frá atvinnu vegna einhverra meina og ætla ég ekki að mótmæla því að svo stöddu.

 En eins og ástandið er í heilbrigðismálum þjóðarinnar, þá eru vart til fjármunir til þess að halda úti lágmarks heilbrigðisþjónustu, nema með herkjum og vona að ekkert óvænt komi uppá sem sett gæti kostnaðinn við heilbrigðiskerfið í uppnám.

 Við þær aðstæður sem nú eru uppi, er það því nánast glæpsamlegt af heilbrigðisyfirvöldum, að láta þessar fjárfestingar allar standa tómar og skila engum arði til þjóðarbúsins, þó svo að ríkið hafi ekki efni á því að reka þær sjálft.

 Það er glæpsamlegur og barnalegur þrái heilbrigðisráðherra, að láta allar þessar fjárfestingar, standa auðar, vegna þess að skoðanir ráðherrans, hníga ekki að einkavæðingu.  Leiga á þessari aðstöðu til einstaklinga, sem gætu þar hafið rekstur á heilbrigðissviði, gæti ekki eingöngu skapað ríkinu tekjur, heldur einnig orðið til þess, að læknar kæmu heim að loknu námi í mun meira mæli en nú er.  Þeim mun lengur sem læknar dvelja erlendis að loknu sérnámi, minnka líkurnar á því að þeir flytji nokkurn tíman heim, eða flytji heim í bráð, heldur ílengist erlendis og komi ekki hér til starfa þegar, upp birtir hér í þjóðfélaginu.  Mun þá einnig glatast sú fjárfesting, sem stofnað var til við það nám í læknisfræði, sem þessir læknar stunduðu hér á landi.

 Það er því lífsnauðsyn að stjórnvöld láti af þessum þráa sínum og fari að kanna möguleikan á því að leigja alla þessa ónotuðu aðstöðu út, eða hluta hennar í ákveðinn tíma, til þess að skapa tekjur og sýna smá viðleitni til þess að halda dýrmætri þekkingu heilbrigðisstétta í landinu.

Breytingar á heilbrigðiskerfinu eru nauðsynlegar til að laða heim íslenska lækna

Athugasemdir

[Ingi Karlsson (IP-tala skráð) 12.7.2010 kl. 07:46]

Sama lausnin hér og oft áður. Það þarf að koma Samfylkingunni og Vinstri Grænum frá völdum hið fyrsta og dæma þau til eilífrar stjórnarandstöðu. Það er dagljóst að þau ætla að keyra á prinsippunum sínum hvað sem það kostar - sbr. aðildarumsókn að ESB, sbr. að hækka sífellt skatta og álögur á okkur sauðsvartan almúgann ef vantar pening í ríkiskassann og sbr. að hætta alfarið að virkja, svo lengi sem það er úti í náttúrunni EN það versta er að ríkisstjórnin stendur gegn kjósendum sínum með fjármálastofnunum sem eru að hluta til í eigu ríkisins (= okkar). Það eitt kallar á byltingu og uppstokkun.