Er Iðnaðarráðuneytið að "hvítþvo" sig og "benda" á Viðskiptaráðuneyti?

Síðan fréttin um "meinta" ráðgjöf Iðnaðarráðuneytisins, til fulltrúa Magma Energy birtist, hafa bloggheimar og fjölmiðlar logað stafna á milli, auk þess sem eldar hafa eflaust logað annars staðar líka.

 Í upphafi, var það þessi yfirlýsing, forstjóra Magma Energy Iceland, sem öllu kom af stað, í gær.

„Bæði iðnaðarráðuneytið og lögfræðingar Magma bentu á þessa leið [að stofna fyrirtækið Magma Energy Sweden], hún er fullkomlega lögleg og ekkert við hana að athuga. Magma vildi stofna fyrirtæki hér en fékk ekki, því var þessi leið farin."

  Síðan í hádegisfréttum útvarps, neitar Katrín Júlíusdóttir því alfarið að ráðuneytið hafi, að einhverju leyti ráðlagt fulltrúum Magma.  Sagðist reyndar hafa heyrt af fundi í ráðuneytinu, á meðan Össur Skarphéðinsson var iðnaðarráðherra, ekki fundið nein skjöl í ráðuneytinu, um þann fund.  Það þarf kannski ekki að koma á óvart, að ekkert finnist, hafi starfsmenn ráðuneytisins ráðlagt Magma í eins veigamiklu máli og um ræðir.

 Eftir útvarpsviðtal það sem útvarpað með Katrínu, þá breytir forstjóri Magma orðalagi þeirrar yfirlýsingar sem hann er sagður, hafa gefið í gær og vitnað er í hér að ofan.

„Ásgeir Margeirsson, framkvæmdastjóri Magma á Íslandi, segir ekki rétt sem haldið var fram í fréttum Sjónvarps í gærkvöldi að hann hafi sagt að iðnaðarráðuneytið hafi ráðlagt fyrirtækinu að stofna skúffufyrirtæki í Svíþjóð, til að geta eignast HS orku á Íslandi. Hins vegar hafi verið rætt á fundi í iðnaðarráðuneytinu "hvernig lögin virkuðu„.

„Magma menn áttu fund með iðnaðarráðuneytinu á síðasta ári," segir Ásgeir um þetta. „Iðnaðarráðuneytið veitti þar ekki leiðbeiningar heldur sagði einfaldlega hvaða lög væru í gildi og svo var rætt um það hvernig lögin virkuðu. Það voru síðan lögfræðingar okkar [hverra, kemur ekki fram en á þessum tíma var Ásgeir, forstjóri Geysis Green, sem átti hlut í HS Orku, sem Magma vildi eignast] sem ráðlögðu Magma um það með hvaða hætti hægt væri að stofna félagið."

Þú segir að rætt hafi verið um hvernig lögin virkuðu. Var þá rætt um þennan möguleika?

„Nei, það var bent á að lögin væru þannig að félög á Evrópska efnahagssvæðinu mættu fjárfesta hér. Magma sagðist þá vilja stofna félag á Íslandi til að gera þetta, en þá kom fram að þetta tiltekna félag sem stofnað væri utan um fjárfestinguna mætti ekki vera á Íslandi heldur yrði það að vera annars staðar á EES-svæðinu. Síðan var farið að ráðum okkar lögfræðinga um það hvernig þetta yrði sett upp."

 þarna birtist eiginlega bara lengri útgáfa forstjóra Magma á Íslandi og í rauninni, það eina sem breytt, er að í seinni yfirlýsingunni, er landið Svíþjóð ekki nefnd á nafn, heldur bara sagt að það þurfi að vera annað EES-land en Ísland.

 Síðdegis í dag, 11. júlí birtist svo yfirlýsing frá Iðnaðarráðuneytinu, þar sem "beinni" ráðgjöf þess er neitað, en samt sagt að frá því lagaumhverfi sem um ræðir í málum sem þessu hafi verið rædd. Síðan kemur eiginlega rúsínan í pylsuendanum.  Ráðuneytið ber af sér sakir um að hafa veitt, ráðgjöfina, enda málið ekki á forræði ráðuneytisins, heldur á forræði, Efnahags og viðskiptaráðuneytis.  Er þá Iðnarðarráðuneytið að hvítþvo sig af "skömminni", þar sem málið var ekki á þeirra forræði og að reyna að koma höggi á viðskiptaráðuneytið og þann ráðherra, sem þar situr og sat í apríl 2009, Gylfi Magnússon sem þótti áður en þetta mál kom fram valtur í sessi, svo ekki sé meira sagt, vegna klúðurslegra viðbragða, við dóm Hæstaréttar í Gengislánamálinu.  Er Iðnaðarráðuneytið að reyna með klækjum að koma sér undan málinu og viðskiptaráðherra frá í leiðinni?  Veik staða Iðnaðarráðherra í stjórninni, myndi í það minnsta styrkjast lítillega við brotthvarf Gylfa og minnka líkurnar á því að því að Iðnaðarráðherra, yrði látinn taka poka sinn, er ráðuneytum verður fækkað eins og frumvarp forsætisráðherra segir til um.  

 En hér kemur svo yfirlýsing Iðnaðarráðuneytisins og getur fólk bara dæmt hvert fyrir sig.

„Hið rétta er að fimmtudaginn 30. apríl 2009 áttu fulltrúar iðnaðarráðuneytis fund með fulltrúum fyrirtækjanna Magma Energy og Geysir Green Energy. Fundurinn var haldinn að beiðni fyrirtækjanna til að upplýsa um lagalegt umhverfi orkumarkaðar á Íslandi. Á fundinum gerðu fulltrúar ráðuneytisins grein fyrir helstu ákvæðum þeirra laga sem varða orkumál og heyra undir iðnaðarráðuneytið....Þá fóru fulltrúar ráðuneytisins einnig yfir þau ákvæði laga nr. 34/1991, um fjárfestingu erlendra aðila í atvinnurekstri, sem lúta að takmörkunum á fjárfestingum erlendra aðila í orkuauðlindum og orkufyrirtækjum, en jafnframt var útskýrt að lögin heyrðu undir viðskiptaráðuneytið... Fulltrúar ráðuneytisins leiðbeindu ekki fyrirtækjunum um stofnun dótturfélags á EES-svæðinu utan Íslands til að eignast HS Orku, enda málið ekki á forræði iðnaðarráðuneytis."  

 

 

 

Athugasemdir

[Dingli, 12.7.2010 kl. 06:47]

Samfylkingin er að drukkna í eigin lygi og óheilindum.

[Jón Valur Jensson, 12.7.2010 kl. 09:32]

Frábær samantekt hjá þér, Kristinn Karl. Ég nefndi þessa grein þína í símtals-innleggi mínu í þátt Péturs Gunnlaugssonar, 'Línan er laus', í Útvarpi Sögu rétt í þessu. Þátturinn verður endurtekinn í kvöld eða nótt. Ég er einng með pistil um þetta í dag á Moggabloggi.